- Bakailaoa: 800 gr., esan bezala gezatuta.
- Oliba-olioa: 1/2 l.
- 4 baratxuri-atal
- 2 tipula
- 2 piper berde
- pipermorro gorri 1
- 5 piper txorizero
- 2 dl. tomate-saltsa
Baratxuri atalak xerratu eta oliotan gorritu. Gorritzean atera eta aparte gorde, eta bakailao puskak oliotan jarri. Oso su eztitan egiten utzi, kazola mugituz, 8 minutu edo. Bakailaoa ez da frijitu behar, oliotan egosi baizik. Denbora hori igaro ondoren, bakailaoa papurtu hezurrak kenduz, baina azalak gorde egin behar dira puska txikitan zatituta. Bakailao papurtua ere erabil daiteke, konfidantzazkoa baldin bada.
Bakailaoa epeltzeko erabili den olioaren parte batean tipulak, piper gorria eta piper berdeak fin-fin txikituta sutan eztitu. Piskat ondu.
Beste aldetik, txorizeroen goiko partea kendu, pepitak ere bai, eta ordu batzuetan eduki ur berotan. Mamia berriz hidratatu denean, piperren azala aizto batekin harraskatuz edo, errazago, pure-egitekotik pasatuz lortuko dugu.
Barazkia erdi egosi denean txorizeroen mamia, bakailaoa egin den oliotan gorritutako baratxuriak eta tomate-saltsa gehitu. Poliki-poliki egosten utzi dena 10 minutuz eta pure-egitekoan pasatu.
Saltsari bakailao papurtua gehitu eta minutu batez dena batera egosten utzi zerbitu baino lehen.
Patatak gehitzen badira, gomendagarria gainera, aurrez frijitu beharko lirateke, tortillarako balira bezala eta, gero, saltsari bota bakailaoa gehitu baino hamar minutu lehenago.
